ಅಂದಿನ ಮೈಸೂರು ರಾಜ್ಯದ ವಿದ್ಯುತ್ ಬೇಡಿಕೆಯನ್ನು ಪೂರೈಸಲು ನಿರ್ಮಾಣ ಮಾಡಿದ ಲಿಂಗನಮಕ್ಕಿ ಅಣೆಕಟ್ಟು ಎಲ್ಲರಿಗೂ ಗೊತ್ತಿರುವ ಸಂಗತಿ ಆದರೆ ಈ ಆಣೆಕಟ್ಟು ಕಟ್ಟುವ ಸಮಯದಲ್ಲಿ ಒಂದು ಸಮಸ್ಯೆ ಎದುರಾಗುತ್ತದೆ. ಅದೇನೆಂದರೆ ಕಾರಣಾಂತರಗಳಿಂದ ಮಳೆಯ ಕೊರತೆಯಿಂದಾಗಿ ಶರಾವತಿಯ ಒಳಹರಿವು ಕಡಿಮೆಯಾದರೆ ಅದನ್ನು ಸರಿದೂಗಿಸವುದು ಹೇಗೆ ಎಂಬ ಪ್ರಶ್ನೆ ಅಂದಿನ ಕಾಲದ ಇಂಜಿನಿಯರುಗಳಿಗೆ ಕಾಡುತ್ತದೆ. ಇದಕ್ಕೆ ಪರಿಹಾರ ಕಂಡುಕೊಳ್ಳಲು ಅಂದಿನ ಇಂಜಿನಿಯರ್ಗಳು ನಿರ್ಮಾಣ ಮಾಡಿದ್ದೇ ಈ ಸಮತೋಲನ ಜಲಾಶಯ ಅಂದರೆ Balancing Reservoir. ಇದು ಬಹುಶಃ ನಮ್ಮ ರಾಜ್ಯ ಹಾಗೂ ದೇಶದಲ್ಲಿ ಅನುಷ್ಠಾನಗೊಂಡ ಮೊಟ್ಟಮೊದಲ ನದಿ ತಿರುವು ಯೋಜನೆ ಆಗಿದೆ. ಶಿವಮೊಗ್ಗ ಜಿಲ್ಲೆಯ ಹೊಸನಗರ ತಾಲೂಕಿನ ಪಶ್ಚಿಮ ಘಟ್ಟದಲ್ಲಿ ಹುಟ್ಟುವ ಸಾವೇಹಕ್ಲು ಹಾಗೂ ಚಕ್ರ ನದಿಗಳು ಮೂಲದಲ್ಲಿ  ಸಂಚರಿಸುತ್ತಿದ್ದ ಪಥವೇ ಬೇರೆಯಾಗಿತ್ತು ಆದರೆ ಈ ಯೋಜನೆ ಅನುಷ್ಠಾನಗೊಂಡ ನಂತರ ಅವುಗಳನ್ನು ಮನುಷ್ಯ ಬಲವಂತವಾಗಿ ಅದರ ಮೂಲ ಪಥದಿಂದ ಬೇರ್ಪಡಿಸಿದ್ದಾನೆ.